Қазақстандық мұғалімдерге кешкі сағат 18:00-ден кейін ата-аналардың хабарламаларына жауап бермеуге рұқсат етілуі мүмкін
Қазақстандық мұғалімдерге кешкі 18:00-ден кейін ата-аналардың хабарламаларына жауап бермеуге рұқсат етілуі мүмкін. Оқу-ағарту министрі Жұлдыз Сүлейменова бұл туралы мәлімдеді.
Фото: primeminister.kz
Қазақстанда мұғалімдердің ата-аналармен байланысына қатысты жаңа реттеу енгізілуі ықтимал. Оқу-ағарту министрі Жұлдыз Сүлейменованың мәлімдеуінше, педагогтарға жұмыс уақыты аяқталған соң, яғни кешкі сағат 18:00-ден кейін ата-аналар тарапынан келетін сұрақтарға жауап бермеуге заң жүзінде рұқсат етілуі мүмкін.
Бұл туралы Qazaqtoday.info сайты хабарлайды.
Министрдің айтуынша, ата-аналар мен мұғалімдер арасындағы байланыс арнайы чаттарда жүзеге асып, ондағы сұрақтар тек жұмыс уақыты ішінде, яғни сағат 18:00-ге дейін қойылуы тиіс. Бұл уақыттан кейін әрбір педагогтың жеке өміріне құрмет көрсетіліп, оның тынығуына ешкім кедергі жасамауы керек.
«Біздің ұстанымымыз айқын: ата-аналар чаттарда сағат 18:00-ге дейін сұрақ қоя алады, ал одан кейін мұғалімнің жеке уақыты басталады және оны құрметтеу қажет», – деп түйіндеді Сүлейменова.
Министрдің сөзіне сүйенсек, биыл «Педагог мәртебесі туралы» заңға тиісті өзгерістер енгізілмек. Онда мұғалімнің сабақ кезіндегі және сабақтан тыс уақыттағы міндеттері, сондай-ақ мектеп пен оқу процесіне қатысты жауапкершілік аясы нақтыланады. Жаңа талаптар педагогтердің жұмыс пен жеке өмір арасындағы шекараны айқындауға бағытталған.
