Мұрат Баймұқашев Қауіпсіздік кеңесі аппаратының басшысы болып тағайындалды
Мұрат Баймұқашев Қазақстан Республикасы Қауіпсіздік кеңесі аппаратының басшысы болып тағайындалды. Оның еңбек жолы мен білімі туралы мәліметтер.
Фото: Ақорда
Мемлекет басшысының Жарлығымен Мұрат Қалибекұлы Баймұқашев Қазақстан Республикасы Қауіпсіздік Кеңесі Аппаратының Басшысы лауазымына тағайындалды. Бұл туралы Ақорданың баспасөз қызметі мәлімдеді.
Бұл туралы Qazaqtoday.info сайты хабарлайды.
Бұған дейін ол Қауіпсіздік Кеңесі хатшысының орынбасары қызметін атқарған. Мұрат Баймұқашевтің еңбек жолы 1994 жылы Талдықорған және Ақмола облыстарының ішкі істер басқармасында мемлекеттік автоинспекция инспекторы болып басталған. Кейін ол ҚР ІІМ жүйесінде әртүрлі басшылық лауазымдарды иеленді: Жол полициясы департаментінде инспектор, аға инспектор, бөлімше және бөлім бастығы, Штаб департаменті бастығының орынбасары, Кадр жұмысы департаментінің бастығы болды.
2009 жылы ол Бас прокуратурада ерекше тапсырмалар жөніндегі аға көмекші, кейін Премьер-Министр Кеңсесінде қорғаныс және құқық қорғау бөлімінің меңгерушісінің орынбасары, ал 2013-2019 жылдары осы бөлімнің бастығы қызметін атқарды. 2019 жылдың сәуірінде Қауіпсіздік Кеңесі хатшысының орынбасары болып тағайындалып, 2020 жылы Әкімшілік полиция комитетінің төрағасы, 2021 жылы Ішкі істер министрінің орынбасары болды. 2022 жылдың мамырынан бастап Қауіпсіздік Кеңесі хатшысының бірінші орынбасары, ал 2023 жылдың қыркүйегінен бастап хатшының орынбасары қызметін атқарды.
Мұрат Баймұқашев 1994 жылы Қазақ ауылшаруашылық институтын инженер-механик мамандығы бойынша, 1998 жылы ҚР ІІМ Қарағанды заң институтын заңгер-құқықтанушы мамандығы бойынша бітірген. 2015 жылы Ресей Президенті жанындағы Халық шаруашылығы және мемлекеттік қызмет академиясының магистратурасын аяқтаған. Ол «Құрмет» (2013) және «Айбын» (2020) ордендерімен марапатталған.
