Қазақ әдебиеті Гуанчжоу кітап көрмесінде таныстырылды
Гуанчжоудағы кітап көрмесінде қазақ әдебиеті таныстырылып, жаңа буын авторлардың шығармалары қытай оқырмандарына ұсынылды.
Сурет: turkystan.kz
Гуанчжоуда өтіп жатқан 30-шы Оңтүстік Қытай кітап көрмесінде Қазақстанның заманауи әдебиетіне арналған арнайы шара өтті. Қазақ қаламгерлерінің туындылары қытайлық оқырманға жол тартып, жаңа буын авторлардың шығармашылығы мен қазіргі әдеби үдерістер талқыланды, деп хабарлайды Qazaqtoday.info сайты.
Сессия барысында Мақсат Мәліктің «Абыл мен Қабыл» романы, Айсұлу Алмасбайдың «Жел тербеген әуен» атты балалар кітабы, Әлішер Рахаттың «Иесіз көлеңке» детективі және Нұрайна Сәтпаеваның «Мұхит жарыққа ұмтылады» прозасы көпшілікке ұсынылды.
Кездесуде аударма ісі, шығармаларды халықаралық аренада дәріптеу және авторлық құқықты қорғау сынды мәселелер сөз болды. Сонымен қатар екі ел арасындағы баспа және әдеби байланыстарды нығайту жолдары қарастырылды.
Көрме барысында Қазақстан павильонында жүзге жуық кітап пен мәдениетіміздің асыл мұралары көрмеге қойылды. Экспозицияда заманауи әдебиет, балаларға арналған туындылар, мәдени мұра мен креативті индустрия бағыттары кеңінен қамтылды.
