Астанада велосипед мінген әйелді жүк көлігі қағып, қаза тапты
Фото: Ашық дереккөз
Астананың Кирпичный ауданында қайғылы жол апаты болып, 46 жастағы әйел көз жұмды, деп хабарлайды Qazaqtoday.info ақпарат порталы.
Жол-көлік оқиғасы сағат 22:50 шамасында Жолымбет және Бестөбе көшелерінің қиылысында тіркелген.
Алдын ала ақпаратқа сәйкес, әйел Жолымбет көшесімен тротуарда велосипед теуіп келе жатқан. Бестөбе көшесіне таяған кезде ол тізгінге ие бола алмай, жолға құлап кеткен.
Осы сәтте жол бойымен қозғалып бара жатқан «Газель» көлігінің артқы дөңгелегі әйелді басып кеткен. Ол алған ауыр жарақаттарынан оқиға орнында қайтыс болды.
Аталған дерек бойынша полиция қылмыстық іс қозғады. Қазір мамандар жол апатының нақты себептері мен мән-жайын анықтап жатыр.
