Түркістан облысында жалған нөмірлі Toyota Camry ұсталды
Түркістан облысында жалған нөмірлі Toyota Camry ұсталды. Жүргізуші 5 тәулікке қамалып, 40 АЕК айыппұл төлейді.
Сурет: Видеодан скриншот
Түркістан облысындағы «Алматы — Ташкент — Термез» тасжолында полицияның цифрлық жүйесі мемлекеттік нөмірі жалған Toyota Camry автокөлігін анықтады, деп хабарлайды Qazaqtoday.info сайты.
Көлік туралы дерек бірден патрульдік полиция экипажына жолданып, тәртіп сақшылары оны тоқтатып, тексеру жүргізді.
«Көлікті тоқтатуға әрекет жасаған кезде жүргізуші полиция қызметкерінің заңды талабына бағынбай, бой тасалауға тырысқан. Патрульдік полиция қызметкерлері құқық бұзушыны жедел ұстады. Көлік тізгінінде Жаңа Тұрмыс ауылының 26 жастағы тұрғыны болғаны анықталды», — делінген хабарламада.
Ол бірнеше бап бойынша әкімшілік жауапкершілікке тартылды. Атап айтқанда, жалған мемлекеттік тіркеу нөмірін пайдаланғаны, көлікті тиісті құжатсыз басқарғаны және билік өкілінің заңды талабына бағынбағаны үшін жауапқа тартылды. Сот шешімімен құқық бұзушы 5 тәулікке әкімшілік қамауға алынды.
Сонымен қатар оған 40 АЕК мөлшерінде айыппұл салынды. Автокөлік тәркіленіп, арнайы тұраққа қойылды.
