Қазақстаннан 2026-2027 жылдары қай елдерге жаңа рейстер ашылады

Фото: pexels

Көлік министрлігі алдағы уақытта шетел бағытында ашылатын жаңа әуе рейстері туралы мәлімдеді. Бұл туралы Qazaqtoday.info сайты хабарлайды.

Ведомствоның Kazinform агенттігіне берген жауабында халықаралық әуе тасымалдары нарығы тұрақты дамып келе жатқаны, қазіргі уақытта 32 елге 161 бағыт бойынша ұшулар жүзеге асырылатыны айтылған. Сонымен қатар, 2026-2027 жылдары Гонконг, Токио, Париж, Рим, Вена, Нью-Йорк және басқа да қалаларды қамтитын жаңа бағыттар бойынша тікелей халықаралық рейстерді ашу мәселелері пысықталуда.

Жыл басынан бері Ереван, Ларнака, Гуанчжоу, Ұлан-Батыр, Батуми, Шанхай, Баку, Варшава, Ташкент, Орынбор, Измир және басқа да қалаларға рейстер ашылып, қайта қалпына келтірілді. Алдағы уақытта Алматы – Үргеніш, Ақтөбе – Баку, Алматы – Чунцин, Ханой – Алматы – Прага, Астана – Инин және басқа да бағыттар бойынша жаңа рейстерді іске қосу жоспарланған.

Бұған дейін Астана халықаралық әуежайынан Ыстанбұлға қатынайтын тұрақты рейстер саны көбейгені хабарланған еді. Биыл көктемде Премьер-министр Олжас Бектенов министрлікке Қазақстаннан тікелей жөнелтілетін халықаралық рейстерді көбейтуді тапсырған болатын.