Павлодарда тротуар опырылып, ер адам ыстық суға түсіп кетті: тұрғындар әкімдіктен жауап күтеді

Павлодарда төрт жасар баламен тротуармен келе жатқан ер адамның аяғының астындағы жер опырылып, ол ыстық су толған шұңқырға түсіп кеткен, деп хабарлайды Qazaqtoday.info ақпарат порталы. 

Оқиға Генерал Дүйсенов көшесі, 10 мекенжайында болған. Желіде жарияланған ақпаратқа сүйенсек, ер адам шұңқырдан өзі шығып, қасындағы баланы қауіпсіз жерге итеріп үлгерген, алайда тізеден жоғары тұсын екінші дәрежелі күйік шалған.

Автордың айтуынша, бұл жерде ашық құдық та, құрылыс жүріп жатқанын немесе қауіп барын ескертетін белгі де болмаған. Тұрғындар қала ортасындағы жаяу жүргіншілер жолының неге мұндай жағдайға жеткенін және қауіпті аумақтың не себепті дер кезінде қоршалмағанын сұрап, Павлодар әкімдігінен түсініктеме талап етіп отыр.

Әзірге әкімдік тарапынан оқиғаның себебі, жолдың жағдайына жауапты мекеме және кінәлі тұлғалар туралы ресми ақпарат жарияланған жоқ.

Видео: @abdu_sabi.