Алматы облысы: Қарғалыда 15 жылдан бері жол жөнделмей, мектеп оқушылары балшық кешуге мәжбүр

Фото: Видеодан скрин

Алматы облысы Жамбыл ауданына қарасты Қарғалы (бұрынғы Фабричный) ауылының тұрғындары жолдың жоқтығынан ашынып, жергілікті әкімдіктің әрекетсіздігіне наразылық білдіруде, деп хабарлайды Qazaqtoday.info ақпарат порталы.

Ауыл ішіндегі Наурыз, А.Бейсеуов, А.Жұрынов және Әлібеков көшелері жылдар бойы асфальт көрмей, шұрық-тесік күйде қалып отыр. Әсіресе №1 мектепке апаратын жолдың тозығы жеткендіктен, жаңбыр жауса, көше тізеден келетін батпаққа айналады.

Тұрғындардың айтуынша, кейбір көшелерге асфальт төселмегеніне 15 жылдан асқан. Оқу жылының басталуына санаулы күндер қалғанда ата-аналар балаларының мектепке лай басып жүретініне алаңдаулы. Әкімдікке жасалған сансыз өтініштерден нәтиже шықпаған соң, халық шенеуніктерден ең болмаса жолды тегістеп, қиыршық тас төсеп беруді сұрайды.