Орны толмас қаза: Актер Рүстем Жаныаманов тұңғыш ұлынан айырылып қалды (ФОТО)

Фото: Рүстем Жаныаманов пен Жанаргүл Жаныаманова

Актер Рүстем Жаныаманов пен оның жары, актриса Жанаргүл Жаныаманованың отбасында қайғылы жағдай болды. Ерлі-зайыптының тұңғыш ұлы Нұрмұхаммет өмірден өтті, деп хабарлайды Qazaqtoday.info.

Қаралы хабарды продюсер Гүлнұр Мамасарипова әлеуметтік желідегі парақшасында жеткізіп, марқұмның ата-анасы мен жақындарына көңіл айтты. Бұл суық хабар өнерсүйер қауымды да бейжай қалдырмады. Желі қолданушылары актерлер отбасының қайғысына ортақтасып, көңіл айту сөздерін жазып жатыр.

«Біздің Рүстем мен Жанаргүл тұңғыш ұлы Нұрмұхаметтен айырылып қалды. Бала – бауыр еттен, мұндайда жұбататын сөз табу да оңай емес. Бекем болыңдар, біз қастарыңдамыз», – деп жазды Гүлнұр Мамасарипова.

Айта кетейік, бұған дейін Рүстем Жаныаманов пен Жанаргүл Жаныаманова тұңғыш ұлдарының денсаулығы үшін ұзақ жыл күрескенін ашық айтқан еді. Олар бірнеше сұхбатында Нұрмұхамметтің ауыр диагнозымен 5-6 жыл бойы арпалысып, оның сауығып кетуі үшін барлық күш-жігерін жұмсағанын бөліскен болатын.

Қазір көпшілік өнер иелерінің отбасына сабыр тілеп, марқұмның иманы саламат болсын деген тілектерін білдіруде.