Астанада «Сириус» мектебі салынады: құрылысты Тоқаев пен Путин бастап берді

Қазақстан Президенті Қасым-Жомарт Тоқаев пен Ресей Президенті Владимир Путин онлайн-форматта Астанадағы «Қазақстан – Сириус» халықаралық білім беру кешенінің құрылысын бастауға арналған капсула салу рәсіміне қатысты, деп хабарлайды Qazaqtoday.info сайты.

Болашақ білім ошағының іргетасына рәміздік капсуланы елордалық оқушылар ҚР Оқу-ағарту министрі Жұлдыз Сүлейменовамен және «Сириус» федералдық аумақ кеңесінің төрағасы, «Талант и успех» қорының жетекшісі Елена Шмелёвамен бірге салды.

Бұл жоба екі мемлекет басшыларының арасындағы келісім негізінде жүзеге асырылып отыр. «Сириус» үлгісіндегі білім беру орталықтары еліміздің екі қаласында құрылмақ. Атап айтқанда, осы жылдың қаңтар айында Алматы қаласында да осындай мектептің іргетасы қаланған болатын.

Жобаның негізгі мақсаты – дарынды балаларға қолдау көрсетіп, ғылым, технология және инновация салаларында бәсекеге қабілетті мамандардың жаңа буынын тәрбиелеу болып табылады.