«Басқа әйелмен ойнастық жасаған»: Ақбаян күйеуі Сәрсемалиевпен ажырасуының себебі белгілі болды

Атырауда төрт бірдей туысын өлтірді деп айыпталған Сұлтан Сәрсемалиевке қатысты сот процесінде қаза тапқандардың туысы Шилмагамбетова куәлік берді, деп хабарлайды Qazaqtoday.info.

Оның айтуынша, күдік марқұм Наурыз Мұқанғалиевке тиесілі малдың сатыла бастағанынан кейін туындаған. Туыстары Наурызбен телефон арқылы байланыса алмағанымен, WhatsApp арқылы хабарламалар келіп тұрған.

Шилмагамбетованың сөзінше, өткен жылдың қараша айынан бастап Сұлтан Сәрсемалиев өзін Наурыздың атынан таныстырып, туыстарына қайын енесі Насип Өтешқалиеваның аяғы ауырып жүргенін және оны емдету үшін Ташкентке алып бара жатқанын жазған. Сондай-ақ ол ем шығындарын жабу үшін отбасының мал сатып жатқанын түсіндірген.

Сот барысында Шилмагамбетова Ақбаян Мұқанғалиева ешқашан күйеуінің күш көрсеткені туралы айтпағанын мәлімдеді. Оның айтуынша, Ақбаян ажырасу туралы шешімді Сұлтанның басқа әйелмен төсекте бірге түскен суретін жібергеннен кейін қабылдаған.

Сондай-ақ ол Сәрсемалиевтің Наурыз Мұқанғалиевтің өлімі абайсызда болды деген нұсқасымен келіспейтінін жеткізді. Айтуынша, Наурыз жанжал шығаратын адам болмаған.

Шилмагамбетова алдын ала тыңдауда айтылған «Ақбаянның туыстары олардың қарым-қатынасына араласты» деген уәжге де қарсы пікір білдіріп, мұндай себеп бүтін бір отбасын қырып жіберуге негіз бола алмайтынын айтты.

Бұған дейін Сұлтан Сәрсемалиев Максот Қарабалинге 9 рет, Насип Өтешқалиеваға 8 рет, ал Мейрамгүл Қарабалинаға 32 пышақ жарақатын салғанын мойындаған болатын. Ал Наурыз Мұқанғалиевтің өлімін айыпталушы абайсызда болған жағдай деп атаған.

Фото: Arasha.kz