Берлинде қазақстандық ұсталды: ол Ресей барлауымен байланыста болған

Германияда Қазақстан азаматы Ресейдің арнайы қызметіне тыңшылық жасады деген күдікпен ұсталды, деп хабарлайды Qazaqtoday ақпарат агенттігі.

Бұл туралы алғаш болып беделді неміс басылымы Spiegel хабарлады. Басылым Германия прокуратурасына сілтеме жасай отырып, тергеу отандасымызды Ресей барлауының байланысшысы деп санайтынын жазды. Күдікті 28 сәуірде Берлин қаласында қамауға алынған.

Осы ақпаратқа байланысты Қазақстан Республикасының Сыртқы істер министрлігі ресми мәлімдеме жасады.

«Бұқаралық ақпарат құралдарында Қазақстан азаматының Германия Федеративтік Республикасында заңға қайшы әрекет жасады деген күдікпен ұсталғаны туралы ақпараттың пайда болуына байланысты Германияның құзыретті органдарына ресми сауал жолданды. Қазіргі уақытта жауап күтілуде», — делінген СІМ хабарламасында.

Министрлік бұл мәселенің тікелей бақылауда екенін атап өтті.

Фото: Әлеуметтік желіден