Үміт үзілді: Ақтөбеде жоғалған 10 жасар баланың денесі өзеннен шықты

Ақтөбе облысында наурыз айының соңында жоғалып кеткен 10 жастағы баланы іздеу жұмыстары қайғылы аяқталды. Бір аптадан астам уақытқа созылған іздеуден соң оның денесі Елек өзенінен табылды, деп хабарлайды Qazaqtoday ақпарат агенттігі.

Төтенше жағдайлар министрлігінің мәліметінше, марқұмның денесі Мәртөк ауданындағы Елек өзенінен табылған. Суға батқан баланың денесі жағадан үш метр қашықтықта, бір жарым метр тереңдікте жатқан.

29 наурыздан бері жалғасқан іздестіру жұмыстарына ТЖМ, полиция, әскери қызметшілер, еріктілер мен жергілікті тұрғындардан құралған үлкен топ жұмылдырылған болатын. Құтқарушылар тікұшақ, дрон және эхолот сияқты заманауи техниканы, сондай-ақ кинологиялық қызметтің иісшіл иттерін пайдаланды.

Іздеу жұмыстарына өзендегі қатты ағыс, арнаның бұралаң болуы, қалың өсімдіктер және судың лайлылығы айтарлықтай кедергі келтірген. Бұған дейін баланың суға құлап кеткені хабарланған еді.

Фото: Әлеуметтік желіден