Бибісара Асаубаева 29 млн теңге ұтып алды: бұл небәрі екінші орын үшін

Қазақстандық шахматшы Бибісара Асаубаева үміткерлер турнирінде екінші орын алып, ірі көлемде жүлде қорына ие болды, деп хабарлайды Qazaqtoday ақпарат агенттігі.

Турнир регламентіне сәйкес, Бибісара екінші орын үшін 17 000 еуро алды. Ал жарыс жеңімпазы атанған үндістандық Вайшали Рамешбабу 28 000 еуроны қанжығасына байлады.

Бұдан бөлек, барлық қатысушыға жинаған әрбір 0,5 ұпайы үшін 2200 еуродан қосымша сыйақы төленді. Асаубаеваның қоржынында сегіз ұпай бар, бұл оған тағы 35 200 еуро әкелді.

Осылайша, қазақстандық спортшының жалпы табысы 52 200 еуроны құрады. Бұл жарияланым сәтіндегі бағам бойынша шамамен 29 миллион теңгеге тең.

Салыстыру үшін, ерлер арасындағы үміткерлер турнирінде жүлде қоры бұдан әлдеқайда жоғары болған. Мәселен, онда әр 0,5 ұпай үшін 5000 еуродан берілді. Өзбекстандық Жавохир Синдаров жеңісі үшін 70 000 еуро және он ұпайы үшін 100 000 еуро алып, жалпы 170 мың еуро (шамамен 95 миллион теңге) табыс тапты.

Фото: Noushad Thekkayil/NurPhoto via Getty Images