Астанадағы сот: екі блогерді полиция күшімен жеткізуге бұйрық берілді
Астанада өтіп жатқан блогерлер Жанабылов пен Төлегенованың ісінде жаңа дау шықты. Сотқа келмеген куәгерлерді полиция күшімен әкелу туралы шешім қабылданды.
Астанада сот процесі өтіп жатқан блогерлер Ерболат Жанабылов пен Эльмира Төлегенованың ісінде жаңа жағдай тіркелді. Сот осы іс бойынша куәгер ретінде шақырылған танымал блогерлер Дархан Жолшыбеков пен Нұрбек Нұртазаны мәжбүрлеп жеткізу туралы қаулы шығарды, деп хабарлайды Qazaqtoday ақпарат агенттігі.
Дархан Жолшыбеков пен Нұрбек Нұртаза сот отырысына куәгер ретінде қатысуы тиіс болған. Алайда екеуі де денсаулығына байланысты Алматыдан Астанаға келе алмайтынын айтып, сотқа онлайн қатысуға рұқсат сұраған.
Іс бойынша мемлекеттік айыптаушы Олжас Хайруллаев куәгерлерді сотқа мәжбүрлеп әкелу туралы қаулы шығаруды сұрады. Бұл өтінішті қорғаушы тарап та қолдады. Судья Әділбек Баймаханов тараптардың уәжін негізге алып, екі блогерді сотқа мәжбүрлі түрде жеткізу туралы шешім қабылдады.
Бұл шешімді орындау Астана қаласының прокуратурасына жүктелді. Сот өкілдері Қылмыстық-процестік кодекстің 157-бабына сәйкес, куәгер дәлелсіз себептермен сот отырысына келмеген жағдайда, оны мәжбүрлеп жеткізу шарасы қолданылатынын еске салды.
Фото: Әлеуметтік желіден
