Щучинсктегі жағдай ушықты: Әскери колледжде 71 кадеттің жағдайы қалай, облыстық ДСБ түсінік берді
Щучинск қаласындағы Шоқан Уәлиханов атындағы әскери колледжде қызылша өршіді. 71 кадет ауру жұқтырып, екеуі жансақтау бөлімінде жатыр.
Ақмола облысының Щучинск қаласындағы Шоқан Уәлиханов атындағы әскери колледжде қызылша өршіп, 71 кадет ауру жұқтырды, деп хабарлайды Qazaqtoday ақпарат агенттігі.
Облыстық Денсаулық сақтау басқармасының мәліметінше, қазіргі уақытта екі жасөспірім облыстық көпсалалы балалар ауруханасының қарқынды терапия палатасында жатыр. Қалғандары инфекциялық аурулар орталығында ем қабылдауда.
«24 пациенттен қызылша зертханалық түрде расталды. Қалғандарына диагноз нақтыланғанға дейін ЖРВИ-ді емдеу стандарттары бойынша терапия жасалып жатыр», — деді ведомство басшысы Нариман Ермек.
Оқу орнының госпиталінде арнайы карантин блогы ашылып, ауру жұқтырғандармен байланыста болғандардың барлығы сол жерге оқшауланды. Бүгінде колледж толығымен эпидемиологиялық режимге көшірілген.
Жақында ғана үш кадет жансақтау бөлімінде жатқан болатын. Қазір олардың жағдайы тұрақтанды: екеуі қарқынды терапия палатасына, біреуі жалпы бөлімге ауыстырылды.
Басқарма өкілдері барлық науқасқа қажетті көмек көрсетіліп жатқанын және жағдай бақылауда екенін жеткізді. Дегенмен, қызылша індеті толық ауыздықталды деп айтуға әлі ерте.
Фото: Әлеуметтік желіден
