Юлия Путинцева әйгілі турнирде қарсыласынан басым түсті

Фото: ҚТФ

Қазақстанның екінші ракеткасы, әлемдік рейтингте 94-орында тұрған Юлия Путинцева Australian Open турнирінің үшінші айналымына жолдама алды, деп хабарлайды Qazaqtoday.info ақпарат порталы.

Екінші кезеңде қазақстандық теннисші әлемнің 60-ракеткасы, франциялық Эльза Жакемомен кортқа шықты. Алғашқы сетте Путинцева қарсыласына еш мүмкіндік бермей, 6:1 есебімен жеңіске жетті. Екінші партияда да ойынын бәсеңдетпей, 6:2 нәтижесін тіркеді.

1 сағат 14 минутқа созылған матчта Юлия 6 брейк-пойнттың бесеуін тиімді пайдаланды. Ал Жакемо бір эйс жасап, бір ғана брейкпен (7 мүмкіндік) шектелді.

Енді Путинцева төртінші айналымға шығу үшін әлемдік рейтингте 112-орында тұрған түркиялық Зейнеп Сонмезпен күш сынасады. Түркия өкілі турнирдің алғашқы кезеңінде сенсация жасап, әлемнің 11-ракеткасы, ресейлік Екатерина Александрованы 7:5, 4:6, 6:4 есебімен жеңген болатын. Осылайша Зейнеп Сонмез «Үлкен дулыға» додасында қарсыласын ұтқан алғашқы түркиялық теннисші атанды.

Сондай-ақ ол бүгін әлемнің 74-ракеткасы, мажарстандық Анна Бондарьды 6:2, 6:4 есебімен жеңіп шықты.