Ресейдің жаңа дроны Иранның көшірмесі болып шықты: Киев мәлімет таратты

Ресей Украинаға шабуыл жасау үшін бұрын-соңды қолданылмаған жаңа «Герань-5» дронын алғаш рет пайдаланды, деп хабарлайды Qazaqtoday ақпарат агенттігі.

Украинаның Бас барлау басқармасы (БББ) соққы жасаған ұшқышсыз ұшу аппаратының қалдықтарының суретін жариялады. Олардың мәліметінше, дронның ұзындығы – шамамен 6 метр, қанатының құлашы – 5,5 метрге дейін, оқтұмсығының салмағы – 90 келі, ал ұшу қашықтығы – 1000 шақырымға жуық.

«Бұған дейінгі «Герань» дрондары сияқты, бұл ұшқышсыз ұшу аппаратын да Ресейдің төл туындысы деп атау қиын. Оның конструкциясы мен технологиясы Иранның «Karrar» дронына айтарлықтай ұқсайтыны анықталды», — деп атап өтті БББ.

Сондай-ақ, барлау басқармасы Ресей ұшу қашықтығын арттыру үшін жаңа дронды Су-25 ұшақтарынан ұшыру нұсқасын пысықтап жатыр деп санайды. Бұдан бөлек, «Герань-5» дронын «әуе-әуе» үлгісіндегі зымырандармен жабдықтау мүмкіндігі де қарастырылуда.

Фото: Украина Қорғаныс министрлігінің Бас барлау басқармасы