Енді дәрігерге қол көтерсеңіз, қатаң жаза күтіп тұр: жаңа заң күшіне енді
Медицина қызметкерлерін қорғау заңмен күшейтілді — енді шабуыл жасағандарға қатаң жаза қарастырылған.
Фото: pexels.com
Қазақстанда медицина қызметкерлерін қорғауға бағытталған маңызды өзгеріс енді ресми түрде қабылданды. Мемлекет басшысы Қасым-Жомарт Тоқаев дәрігерлер мен жедел жәрдем жүргізушілеріне шабуыл жасағандарға қатысты жазаны қатайтатын заңға қол қойды.
Мәжіліс депутаты Асхат Аймағамбетов бұл өзгерістердің маңызын атап өтті. Оның айтуынша, егер бригадаға ешкім кедергі келтірмесе, жедел жәрдем де уақытында жетеді. Бұл әсіресе ауыр халдегі науқастар үшін өте маңызды.
Бұл туралы Qazaqtoday ақпарат агенттігі хабарлайды.
Бұған дейін медицина қызметкерлеріне жасалған шабуылдар «ұсақ бұзақылық» ретінде ғана қаралатын. Ал енді дәрігер мен жедел жәрдем қызметкері полиция, құтқарушы, орманшы сияқты арнайы мәртебеге ие болды. Бұл олардың өмірі мен кәсіби қауіпсіздігін сенімдірек қорғауға мүмкіндік береді.
Бұл заң неліктен маңызды және кімге әсері мол?
Асхат Аймағамбетовтың пікірінше, бұл бастама тек медицина мамандарын емес, науқастардың өздерін қорғауға бағытталған. Себебі маман өзін қауіпсіз сезінсе, қолы аман болса — ол жұмысын тастамай, мыңдаған отаны сәтті жасайды.
«Мұндай құқықтық қорғау – инфаркт алған әжеге де, тырыспа ұстап қалған балаға да қажетті. Егер дәрігерге ешкім қол көтермесе, онда жедел жәрдем де кешікпейді», — деді депутат.
Ол шабуылдың тек бір адамның мәселесі ғана емес, уақыт жоғалтуға, емнің бұзылуына, тіпті адамның өміріне қауіп төндіретінін баса айтты.
Ендігі жаза қандай болады?
Қылмыстық кодекске жаңа 380-3-бап енгізілді. Бұл бап бойынша медицина қызметкеріне шабуыл жасағандар қатаң жазаға тартылады. Бұл нормалар Сенат тарапынан 2025 жылдың желтоқсанында мақұлданған болатын.
Соңғы бес жылда Қазақстанда 175-тен астам медицина қызметкеріне шабуыл тіркелген. Өкінішке қарай, мұндай оқиғалар азаяр емес.
Аймағамбетовтың сөзін түйіндесек: «Қорғалған дәрігер — құтқарылған адам. Бұл өзгертуді қажет етпейтін қағида».
