Ұлттық банк базалық мөлшерлемені 16,5% деңгейінде өзгеріссіз қалдырды

Фото: Kazpravda.kz / Адильбек Тауекелов

29 тамызда Ұлттық банктің Ақша-несие саясаты комитеті базалық мөлшерлемеге қатысты кезекті шешімін шығарды, деп жазады Qazaq Today ақпарат порталы. 

Қаржы ұйымы түсіндірмесінде жылдық инфляцияның 11,8 % деңгейінде сақталғанын атап өтті.

Ұлттық банк дерегінше, шілдеде халықтың инфляцияға қатысты болжамы 14,2%-ға дейін өскен. Қысқамерзімді болжам – құбылмалы, ал ұзақмерзімді болжамдар әлі де жоғары. 2025 жылы инфляция – 11-12,5%, 2026 жылы – 9,5-11,5%, 2027 жылы – 5,5-7,5% шегінде болмақ.

«Болжам жекелеген азық-түлік нарықтарында бағаның күрт өсуіне, сұраныс жағынан инфляциялық қысымның күшеюіне байланысты нақтыланды. Ұстамды қатаң ақша-кредит саясаты және жоспарланған фискалдық шоғырландыру шаралары инфляцияға тежеуші әсер ететін болады. Болжам тәуекелдері фискалдық тәртіпті сақтауға, ішкі сұраныстың күшеюіне, сыртқы инфляцияның жеделдеуіне, инфляциялық күтулердің тұрақтамауына, сондай-ақ реттелетін бағалар мен ҚҚС көтерілуінің жанама әсеріне байланысты», – деп хабарлады реттеуші.

Ал Қазақстан экономикасының 2025 жылға арналған өсу болжамын 5,5-6,5%-ға дейін жақсартты. 2026 жылға болжам 4-5% деңгейінде сақталды.

«Мұнай секторындағы өсімнің жалғасуы және инвестициялық белсенділік 2026 жылы экономиканың өсуін қамтамасыз етеді. Жаңа болжамдарға сәйкес 2027 жылдан бастап ЖІӨ өсуінің қарқыны теңгерімділік деңгейге ұмтылады», – деп түсіндіреді Ұлттық Банк.

Бірақ Ұлттық банк алдағы уақытта инфляция қарқыны баяуламаса, базалық мөлшерлемені көтеруі мүмкін екендігін ескертеді.

«Алдағы айларда инфляция қарқынының айтарлықтай баяуламауы қалыптасып отырған ақша-кредит шарттарын қатаңдатуға негіз болады, ол шарттар инфляцияның 5%-дық ортамерзімді нысанаға қарай орнықты түрде төмендеу траекториясына оралуына ықпал етеді. Осыған байланысты ақша-кредит саясаты комитеті алдағы отырыстарда базалық мөлшерлемені көтерудің орындылығын қарастыратын болады», – деп мәлімдейді реттеуші.