«Анашым, қайдасың?»: бельгиялық Жәнібек жазбасымен көпшілікті жылатты

Қазақстанда туып, алайда тағдырдың жазуымен бельгиялық отбасы асырап алған  Мұрат Савелиев желідегі жазбасымен жұртты жылатты, деп хабарлайды Qazaq Today ақпарат порталы. 

«Анашым, қайдасың? Биыл қуантқан, мұңайтқан сәттер де болды, бірақ мені мазалайтын жалғыз сұрақ: «Анашым, қайдасың?»

Кейде менен неге анамды немесе отбасымды тапқым келетінін сұрайтындар бар, бұл сұрақтың жауабы түсінікті деп ойлаймын. Адамға өмірді бірге сүретін анасы, әкесі, аға-інісі, қарындас-әпкесі болуы керек қой. Бөлек қалып, жылап жүрмей, бірге жүріп, мықты болған дұрыс деп ойлаймын. Мысалы, ата-анаммен, аға-қарындаспен бірге Жаңа жыл мерекесін тойласам, керемет емес пе?» — деп бельгиялық Жәнібек күрсіне жазды.

Ол өз сөзінде қазақ еліне алғысын білдіріп өтті.

«Менің жаңа жылдық сыйлығым – өздеріңіз, бұл сөзсіз! Маған әке-шешемдей жақсылық тілеп отыратын қазақ елі бар деген ойдың өзі жүрегіме жылу сыйлайды.

Менің туған анамды іздеуге байланысты қазіргі уақытта не істеп жатқанымыз туралы көбірек ақпарат алғыңыз келе ме?» — дейді Мұрат Савелиев.