«Қалыңмалым 1000 доллар болды»: Дана Есеева алғаш келін болып түскен кезін еске алды

Отандық танымал блогер әрі кәсіпкер Дана Есеева отбасындағы ерекше дәстүрлер туралы айтып, алғаш тұрмысқа шыққан кезін еске алды. Желі жұлдызы жолдасы Мейіржан Төребаевтың жанұясына сіңісу үшін не істегенін айтты, деп жазады Qazaq Today ақпарат порталы.

Дана Есеева отбасындағы дәстүр туралы Дина Төлепбергенге берген сұқбатында айтты. Оған қоса блогер алғаш келін болып түскен кезін еске алып, қалыңмалы қанша болғанын жеткізді.

«Біз дастарханға барлығымыз бірге отыруға тырысамыз. Сосын үйде нанды ер адам кеседі. Мейіржан жоқ болған соң, бұл қызметті үлкен ұлым атқарады. Мен бала кезімнен сондайды көріп өстім. Нанды әркез әкем кесетін. Біз тиіспейтінбіз. Менің қалыңмалым 1000 доллар болды. Ол кезде доллар деген басқаша ғой. 120 мың теңге шамасында болды. Сол кездегі баға бойынша ол өте жеткілікті сомма болды. Мейіржанның отбасы сондай қаражат алып келген болатын. Беташарда бір қызық жағдай болды. Мен тек сол кезде ғана Мейіржанның ағалары мен көкелерінің есімін атай алмайтынымды білдім. Жаңа отбасыға сіңісу үшін сен олардың заңдары мен дәстүрін қабылдайсың. Әйел адам нағыз байланыстырушы құрал екенін сезіндім. Ер адам сыртқы өмірде маңызды болса, әйел ішкі өмірде маңызды тұлға», — деді ол.