Баян-Өлгейге тікелей шығу: Қазақстан мен Моңғолия арасында жаңа жол салынатын болды

Қазақстан Баян-Өлгей қазақтарына төтелей баратын жаңа автомобиль жолын салуға мүдделі. Ел билігі Монғолиямен жол  мәселесін талқылады. Егер Ресей тарапы жаңа жолды салуға рұқсат берсе, Баян-Өлгейге бару уақыты екі есеге дейін қысқарады, деп хабарлайды Qazaq.today.  

Көлік министрлігінің ақпаратынша, автожолдың жаңа бағыты Өскемен, Риддер қалалары және Туэкта (Ресей) елді мекені арқылы өтіп, батыс Моңғолия шекарасына төтелей шығады.

Жаңа маршруттың Қазақстандағы учаскесі Өскемен қаласынан Ресей шекарасына дейінгі аралықта салынып қойды. Оның жалпы ұзындығы – 189 шақырым, 62 шақырымда күрделі және орташа жөндеу жұмыстары жүргізіледі.

«Жаңа автожол жол жүру уақытын едәуір қысқартып, Қазақстан мен Моңғолия арасындағы көлік байланысын жақсартып қана қоймай, экономикалық және мәдени байланыстарды нығайтуда маңызды қадам болады», — деп атап өтті Көлік министрлігі.

Автожолдың көп бөлігі Ресей аумағы арқылы өтеді, егер көрші ел жол салуға келісім берсе, жаңа маршрут 837 шақырымды құрамақ.

Ал қазір қолданыстағы «Өскемен – Рубцовск – Барнаул – Туэкта автомобиль жолы – Моңғолия шекарасы» тас жолының ұзындығы 1 604 шақырымға дейін барады.