170 млн теңге: Қырғызстаннан Қазақстанға 3,3 кг алтын өткізбек болғандар ұсталды

Қырғызстан мен Қазақстан шекарасындағы «Кең-булуң» бақылау-өткізу бекетінде Қазақстанға көлік ішінде 3,3 келі алтын құймаларын алып өтпек болғандар ұсталды.

Фото: instagram.com/gknb.official

Бұл туралы Қырғызстанның мемлекеттік ұлттық қауіпсіздік комитеті мәлімдеді.

Комитет мәліметінші, 17 қыркүйек күні «Кен-Булун» бақылау бекетінде Қазақстанға бет алған Lexus 470 маркілі көлігі тоқтатылып, көлікті тексеру барысында арнайы орнатылған жасырын орын анықталған. Ол жерден салмағы 3,3 кг болатын Қырғызстаннан шығаруға рұқсат құжаттары жоқ алтын құймалары табылды.

«Қазіргі уақытта жедел-іздестіру шаралары аясында республикалық бюджетке келтірілген шығын көлемін есептеу, сондай-ақ құрамында алтыны бар металдарды заңсыз алып өтуге қатысы бар өзге де тұлғаларды анықтау жұмыстары ұйымдастырылуда», – делінген хабарламада.

Алдын ала мәлімет бойынша, Қырғызстанның мемлекеттік ұлттық қауіпсіздік комитеті өкілдері алтын құймаларының жалпы бағасын шамамен 30 миллион сомға бағалап отыр. Бұл шамамен 170 млн теңгені құрайды.

Еске салсақ, бұған дейін Қазақстанда қылмыстық топтың кен орындарынан алтын мен қымбат металл ұрлап келгені туралы жазған едік.