Алдын ала мәліметке сәйкес, мемлекет басшысы лауазымына үміткер ретінде 11 адам құжат тапсырған. Алайда олардың барлығы әзірге ресми кандидат ретінде тіркелген жоқ.
Енді президент сайлауына қатысуға ниетті азаматтар сайлаушылардың қолын жинап, тиісті құжаттарын тапсыруы тиіс.
Қырғызстанның сайлау заңнамасына сәйкес, әрбір үміткер кемінде 30 мың сайлаушының қолдауын жинауы қажет.
Электрондық қолтаңба жинау науқаны 2026 жылғы 7 желтоқсанға дейін жалғасады. Ал кандидаттарды тіркеуге қажетті құжаттар 13 желтоқсанға дейін қабылданады.
Орталық сайлау комиссиясы кандидаттарды тіркеуді 23 желтоқсанға дейін аяқтауды жоспарлап отыр.
Қырғызстан президенттігіне кімдер үміткер?
Президент сайлауына қатысуға ниет білдірген 11 азаматтың арасында саясатта бұрыннан жүрген тұлғалар да, кәсіпкерлік саласының өкілдері де бар.
Аймен Касенов – кәсіпкер және қоғам қайраткері. Бұған дейін де Қырғызстан президенті болуға талпыныс жасаған.
Азамат Эсенбеков – экономист, қаржы саласында еңбек еткен және жергілікті басқару жүйесінде қызмет атқарған бұрынғы әкім.
Сыймык Жапыкеев – сыбайлас жемқорлыққа қарсы мәлімдемелерімен танылған саясаткер. Ол «Чоң Казат» қозғалысы арқылы көпшілікке белгілі болды. Бұған дейін Қырғызстанның Қаржы полициясын басқарған.
Акай Кыдыров – кәсіпкер. Жапонияда жұмыс тәжірибесі бар. Президенттікке үміткерлер арасындағы ең жас қатысушы ретінде аталып отыр.
Исхак Масалиев – Қырғызстан саясатындағы тәжірибелі тұлғалардың бірі. Ол бұған дейін Жогорку Кенештің, яғни ел парламентінің депутаты болған.
Садыр Жапаров – Қырғызстанның қазіргі президенті. Ол мемлекет басшысы қызметін жалғастыру үшін алдағы президент сайлауына қатысуға ниет білдірген.
Бактыбек Калмаматов – Жогорку Кенештің бұрынғы депутаты. Бұған дейін де президент сайлауына қатысқан.
Бакытбек Адылов – бұрынғы қала басшысы және Қырғызстанның Мемлекеттік көші-қон қызметін басқарған шенеунік.
Амур Айба Медер – кәсіпкер. Ашық дереккөздерде оның кәсіпкерлік қызметпен айналысатыны көрсетілген. Әзірге саяси бағдарламасы мен қызметіне қатысты ақпарат шектеулі.
Мамбетжунус Абылов – Қырғызстанның Орталық сайлау комиссиясын бұрын басқарған саясаткер. Сондай-ақ елдің Төтенше жағдайлар министрлігіне жетекшілік еткен.
Клара Сооронкулова – Қырғызстан Конституциялық палатасының бұрынғы судьясы. Ол қазіргі үміткерлер тізіміндегі жалғыз әйел.
