Қазақстан 38 тауар позициясы бойынша импортты экспорттан 1,8 есе асырды
Қазақстан 38 тауар позициясы бойынша 5,8 млрд долларлық импорт жасап, экспорттан 1,8 есе асырды. Косметика, шоколад, кабель және жабдықта алшақтық ең үлкен.
Сурет: inbusiness.kz
Қазақстан тұтыну және өнеркәсіп тауарларының бірқатары бойынша экспорттағанынан көбірек импорттайды. Ең айқын алшақтық өнеркәсіптік жабдық, кабель, шоколад және косметика жеткізілімінде тіркелді. Сонымен қатар жекелеген санаттарда, атап айтқанда балмұздақ пен темекі өнімдерінде экспорт импорттан асып түсті.
Бұл туралы Qazaqtoday.info сайты хабарлайды.
Қарастырылып отырған 38 тауар позициясы бойынша Қазақстанға импорттың жалпы көлемі 5,8 млрд долларды құрады. Бұл 3,3 млрд долларға жеткен экспорттан 1,8 есе көп.
Кіргізу мен шығару арасындағы ең үлкен айырма тұтыну және өнеркәсіп тауарлары санаттарында байқалды.
Мәселен, косметика импорты 217,8 млн долларды құраса, экспорты 83,3 млн доллар болды. Осылайша, шетелден сатып алу сыртқы нарықтарға жеткізуден 2,6 есе асып түсті.
Шоколад бойынша алшақтық одан да айқын: Қазақстан бұл өнімді 318,3 млн долларға әкелсе, 105,8 млн долларға экспорттады. Импорт үш есе жоғары болып шықты.
Кабельдер бойынша айырма 6,7 есеге жетті: импорт көлемі 291,2 млн долларды құраса, экспорт 43,6 млн доллар болды. Келтірілген санаттардың ішіндегі ең үлкен алшақтық өнеркәсіптік машиналар мен жабдықтар бойынша тіркелді. Олар шетелден 432,1 млн долларға сатып алынса, экспорт 33,8 млн долларды құрады. Осылайша, импорт экспорттан 12,8 есе асып түсті.
Сонымен қатар кейбір тауар позициялары бойынша Қазақстан шетелге әкелгенінен көбірек өнім жеткізді. Атап айтқанда, балмұздақ экспорты 59,5 млн долларға жетсе, импорты 39,2 млн доллар болды. Сигаралар мен сигареттер бойынша да арақатынас экспорттың пайдасына қалыптасты: 164,5 млн доллар экспортқа қарсы 44,3 млн доллар импорт.
