Алматы облысында қойма өрті: құтқарушылар 5 газ баллонын алып шықты
Алматы облысының Іле ауданындағы қойма өрті толық сөндірілді. Құтқарушылар өрт ошағынан 5 газ баллонын шығарып, жарылыс қаупін болдырмады. Зардап шеккендер жоқ.
Сурет: ТЖМ
Алматы облысының Іле ауданында бір қабатты қойма ғимаратында ірі өрт болды. Төтенше жағдайлар министрлігінің қызметкерлері жалынның көршілес ғимараттарға таралуына жол бермей, өрт ошағынан бес газ баллонын қауіпсіз жерге шығарды.
Бұл туралы Qazaqtoday.info сайты хабарлайды.
Оқиға 28 қазанда Алматы қаласына жақын орналасқан Іле ауданының Ащыбұлақ ауылдық округінде тіркелген.
Төтенше жағдайлар министрлігінің мәліметінше, өрт сөндірушілер оқиға орнына жеткенде бір қабатты қойма ғимаратын жалын толық шарпыған болатын. Құтқарушылар дереу өртті сөндіруге кірісіп, жақын маңдағы ғимараттарды оттан қорғау шараларын жүргізді.
«Өрт сөндірушілердің жедел әрі үйлесімді әрекетінің арқасында тілсіз жаудың көршілес ғимараттарға таралуына жол берілмеді. Сонымен қатар өрт ошағынан 5 газ баллоны қауіпсіз жерге шығарылып, ықтимал жарылыстың алды алынды», – делінген ТЖМ хабарламасында.
Оқиға орнындағы ең қауіпті жағдайлардың бірі қоймада газ баллондарының болуы еді. Құтқарушылар оларды дер кезінде қауіпсіз жерге шығарып, жарылыс қаупінің алдын алды.
ТЖМ өкілдерінің хабарлауынша, өрт толық сөндірілген. Оқиға салдарынан зардап шеккендер жоқ.
