«Дала дәмі» жәрмеңкелері үшінші апта қатарынан өтіп жатыр

Фото: Сауда және интеграция министрлігі

Үшінші апта қатарынан Қазақстанда «Дала дәмі» ауыл шаруашылығы жәрмеңкелері ұйымдастырылып келеді. Бұл шаралар Сауда және интеграция министрлігінің қолдауымен өткізілуде. Жәрмеңкелерде отандық фермерлер өз өнімдерін делдалсыз, тікелей тұтынушыларға ұсынады.

Бұл туралы Qazaqtoday.info сайты хабарлайды.

Осы аптада республика бойынша жәрмеңкелерге 7 568 тонна ауыл шаруашылығы өнімі шығарылды. Оның ішінде Астанада 400 тоннадан астам өнім ұсынылады.

Осы демалыс күндері елордада Шығыс Қазақстан және Ақтөбе облыстарының шаруалары өз өнімдерін ұсынады.

Жәрмеңкелерде өнім бағасы тиімді. Өткен аптада бірқатар тауарлар нарықтағы бағадан 15-20 пайызға арзан сатылды. Мәселен, Астанада сиыр және жылқы етінің келісі 3 500 теңгеден ұсынылса, Қостанайда сиыр еті 3 200–3 500 теңге, жылқы мен қой еті 3 мың теңгеден басталды.

Жәрмеңкелерде ет, сүт өнімдері, көкөніс пен жеміс-жидек, балық, дәнді дақылдар және басқа да отандық өнімдер ұсынылады. Ет өнімдеріне сұраныс жоғары.

«Дала дәмінің» басты ерекшелігі — фермерлердің өнімдерін тікелей сатуы. Сауда орындары жергілікті ауыл шаруашылығы өндірушілеріне тегін беріледі.

Жәрмеңкелер еліміздің барлық өңірінде әр демалыс сайын жалғасады.