Астанада «Жайық толқыны» көрмесі өтті: 3 мың қонақ, 5 млн теңгеден астам сатылым

Сурет: inbusiness.kz

Qazaq Creative Hub алаңында Батыс Қазақстан облысының «Жайық толқыны» атты креативті көрмесі мәресіне жетті. Іс-шара Қазақстан Республикасы Мәдениет және ақпарат министрлігінің қолдауымен республикалық Creative Aimaq жобасы аясында ұйымдастырылды.

Бұл туралы Qazaqtoday.info сайты хабарлайды.

Жиында дәстүрлі қолөнер шеберлері, суретшілер, зергерлер, дизайнерлер, сондай-ақ ағаш пен былғарыны өңдеу мамандары бас қосты — барлығы 40-тан астам қатысушы.

Экспозиция қала тұрғындары мен елорда қонақтарының назарын ерекше аударды: екі күнде көрмені 3 мың адам тамашалап, авторлық өнімдердің жалпы сатылымы 5 млн теңгеден асты. Келушілер бірегей туындыларды сатып алумен қатар, ұлттық музыкалық аспаптар жасау, ағаш ою және қолданбалы өнер бойынша шеберлік сабақтарына қатыса алды.

Көрменің сән бағдарламасы айрықша қызығушылық тудырды: өңірлік брендтер — «Мария ханым» сән үйі, AS_brands.kz сән орталығы және «ДариЛили» сән орталығы өз коллекцияларын ұсынды. Сонымен қатар ұйымдастырушылар Жайық өңірінің тарихи-мәдени мұрасына ерекше көңіл бөлді: облыстық тарихи-өлкетану мұражайы «Балбалтас баяны» және «Музей мұрасы» жобаларын, сондай-ақ «Долана» анимациялық фильмін таныстырды.

Creative Aimaq жобасы өңірлік креативті индустрияларды қолдау, отандық брендтерді ілгерілету, шеберлер үшін өткізу нарықтарын кеңейту және елдің мәдени мұрасын насихаттау мақсатында жүзеге асырылып отыр.