TikTok эфирінде балағаттаған тағы екі қазақстандық әйел қамауға алынды
TikTok тікелей эфирінде балағат сөздер айтқан тағы екі қазақстандық әйел бес тәулікке әкімшілік қамауға алынды. Полиция оқиға авторынок аумағында түсірілгенін анықтады.
Сурет: newtimes.kz
Авторынок аумағында түсірілген бейнежазбаны тексерген полицейлер оған қатысушылардың жеке басын анықтап, материалдарды сотқа жолдады. Нәтижесінде екі әйелдің әрқайсысына бес тәулік әкімшілік қамау жазасы тағайындалды.
Бұл туралы Qazaqtoday.info сайты хабарлайды.
«Қоғамдық кеңістік, соның ішінде әлеуметтік желілер мен тікелей эфирлер азаматтарды қоғамдық тәртіпті бұзғаны үшін жауапкершіліктен босатпайды. Бұл жағдайда құқыққа қайшы әрекет тіркеліп, қатысушылардың жеке басы анықталды, содан кейін материалдар сотқа жіберілді. Әкімшілік жаза шарасы туралы шешімді сот қабылдады», — деп атап өтті полицияда.
Полиция өкілдері әлеуметтік желілердегі қоғамдық тәртіп бұзушылықтар да жауапкершілікке әкеп соғуы мүмкін екенін еске салды.
Бұған дейін Шымкентте TikTok эфирінен кейін блогерлердің қамауға алынғаны туралы хабарлаған болатынбыз.
