Түнгі уақытта шу шығарғаны үшін айыппұл салынбады — полиция түсініктеме берді
Түркістан облысында тұрғын полицияны күлгені үшін жауапқа тартты деп айыптады. ІІМ бұл ақпаратты жоққа шығарып, оқиғаның мән-жайын түсіндірді.
Сурет: turkystan.kz
Түркістан облысында бір тұрғын полиция қызметкерлерін «күлгенім үшін жауапқа тартты» деп айыптаған. Алайда Ішкі істер министрлігі бұл ақпаратты жоққа шығарып, оқиғаның мән-жайын түсіндірді, деп хабарлайды Qazaqtoday.info сайты.
Полицияның мәліметінше, оқиға түнгі сағат 01:00 шамасында болған. Қызмет бабында жүрген полицейлер терезелері ашық тұрған автокөлікті байқаған. Көліктен қатты музыка шығып, ішіндегі қыздар айқайлаған, осылайша түнгі тыныштық бұзылған.
Сақшылар автокөлікке жақындап, құжаттарды тексеріп, жүргізушіге келу себебін сабырлы түрде түсіндірген. Олар ауызша ескертумен шектеліп, азаматты босатқан. Полиция өкілдері айыппұл салынбағанын және әкімшілік жауапкершілікке тартылмағанын атап өтті.
Дегенмен, азамат полициямен сөйлесу кезінде эмоцияға беріліп, дауыс көтеріп, оқиғаны бейнетаспаға түсірген. Кейін ол әлеуметтік желілерде бұрмаланған ақпарат таратқан. Министрліктегілер оқиғаның барлық мән-жайы полицияның бейнетіркегішіне жазылғанын, бейнежазбалар тексеріліп, қызметкерлердің әрекетінен заң бұзушылық анықталмағанын жеткізді.
