Теміртауды кәріз суы басып жатыр: Әкімдік пен жауаптылар құр уәдеден асар емес
Фото: Видеодан скрин
Теміртау қаласындағы Мүсәлімов көшесі, 14-үйдің маңында кәріз жүйесінің істен шығып, айналаны лас судың басып жатқанына тұрғындардың шыдамы таусылды, деп хабарлайды Qazaqtoday.info ақпарат порталы.
Жергілікті халық «Аква трейдинг» мекемесі мен тұрғын үй-коммуналдық шаруашылығы (ТҮКШ) бөлімінен тек қағаз жүзіндегі сылтаулар мен құр уәдеден өзге нақты көмек көре алмай отырғанын айтып, дабыл қағуда.
Салғырттық танытқан қала әкімдігі мен жауапты мекемелер өз міндетін орындаудың орнына, мәселені жылы жауып қоюға әдеттенгендей.
Ал аққан судың жағымсыз иісі мен залалына уланып отырған қарапайым халықтың денсаулығы мен қауіпсіздігіне бас ауыртып жатқан ешбір шенеунік көрінбейді. Сезімге ерік бермей, нақты іске көшетін, халықтың жанайқайын еститін әкімдік Теміртауда қашан пайда болады деген сұрақ ашық күйінде қалып отыр. Елдің жүйкесін тоздырған бұл былықтың қашан тиылатынын уақыт көрсетеді, бірақ тұрғындар енді үнсіз қалмақ емес.
