Конго орманынан ғылымға белгісіз маймылдың жаңа түрі табылды
Халықаралық ғалымдар тобы Конгоның тропикалық ормандарынан африкалық маймылдың ғылымға бұрын белгісіз болған жаңа түрін анықтады. Оған Colobus congoensis деген ғылыми атау берілді. Бұл – соңғы 75 жылда Африкада тіркелген маймылдардың бесінші жаңа түрі, деп хабарлайды Qazaqtoday.info ақпарат порталы.
Phys.org басылымының мәліметінше, жаңа түр Ломами мен Конго өзендерінің арасындағы адам сирек баратын қалың ормандарды мекендейді. Ғалымдар бұл аумақты ұзақ жылдар бойы зерттегенімен, маймылдың жеке түр екенін тек 2008 жылдан басталған көпжылдық бақылаулардың нәтижесінде дәлелдеген.
Зерттеушілердің дерегінше, 2018–2022 жылдары шамамен 1700 шаршы шақырым аумақта бұл маймыл небәрі 114 рет қана байқалған. Ал жергілікті тұрғындар оны «Ликвели» деп атап, өте сирек кездесетін жануар екенін айтады.
Мамандардың пікірінше, Colobus congoensis түріне жойылып кету қаупі төніп тұр. Бұған оның таралу аймағының тар болуы, ормандардың жаппай кесілуі және заңсыз аңшылық әсер етуде.
Сондықтан ғалымдар бұл маймылды Табиғатты қорғаудың халықаралық одағының (IUCN) Қызыл тізіміне жойылып кету қаупі жоғары түрлердің қатарына енгізуді ұсынып отыр.
Зерттеу барысында жануардың генетикалық ерекшеліктері, дене құрылысы және дыбыс шығару қабілеті жан-жақты талданған. Сараптама нәтижесінде оның дербес эволюциялық тармақ екені анықталған.
Жаңа түрдің бірқатар ерекше белгілері бар. Оның жүні жылтыр қара түсті, құйрығы ұзын, ал мұрны мен аузының айналасында қызғылт сары және ақшыл кілегей түсті дақтар орналасқан. Осы ерекшеліктер маймылдың бетіне бетперде кигендей әсер береді. Сонымен қатар бас сүйегінің құрылысы, тістерінің пішіні мен дыбыс шығару ерекшеліктері де басқа колобус түрлерінен айтарлықтай өзгеше екені анықталған. Бұл белгілер ғалымдарға оның жаңа түр екенін түпкілікті растауға мүмкіндік берген.
