Мюнхенде ауызсу тұтынуға шектеу енгізілді

Германияда ұзаққа созылған қуаңшылықтан Мюнхен қаласында алғаш рет ауызсуды пайдалануға шектеу енгізілді, деп хабарлайды Qazaqtoday.info.

Тұрғындар тіршілік нәрін 1 тамызға дейін үнемдеп қолдануға тиіс. Жаңа талапқа сай жеке бассейндерді толтыруға, субұрқақтарды іске қосуға, таңғы 09:00-ден кешкі 19:00-ге дейін бақтар мен көгалдарды суаруға тыйым салынады.

Сондай-ақ автокөлікті арнайы жуу орынынан тыс жерде жууға болмайды. Өзен-көлдер мен жеке құдықтардан алынған суды тұрмыстық мақсатта пайдалануға да рұқсат жоқ. Тәртіпті бұзғандарға 50 мың еуроға дейін айыппұл салынуы мүмкін. Билік бұл шараларды жерасты су қорын сақтау үшін қолға алғанын айтады. Өйткені кейінгі жылдары аптап ыстықтан жауын-шашын азайған.