Францияда аптап ыстыққа байланысты үш атом реакторының жұмысы тоқтатылды
Фото: © istockphoto.com
Францияда аптап ыстыққа байланысты атом электр станцияларындағы үш реактордың жұмысы уақытша тоқтатылды. Мұндай шектеуді EDF энергетикалық компаниясы енгізді, деп хабарлайды Les Echos-ке сілтеме жасаған Qazaqtoday.info.
Сөз Гаронна өзенінің бойындағы «Гольфеш» АЭС-інің екінші реакторы, Рона өзеніндегі «Бюже» АЭС-інің үшінші реакторы және Мез өзеніндегі «Шо» АЭС-інің екінші реакторы туралы болып отыр. Басылымның мәліметінше, ауа мен су температурасының жоғары болуына байланысты тағы сегіз реакторда электр энергиясын өндіру көлемі азайтылған.
Les Echos атап өткендей, реакторларды салқындатуға пайдаланылатын өзен суының шамадан тыс жылынуы энергоблоктарды қалыпты режимде пайдалануға мүмкіндік бермей отыр. Бұған дейін 9 шілдеде «Гольфеш» АЭС-інің бір реакторына қатысты осындай шешім қабылданған болатын.
Аптап ыстық Франциядағы түрлі салаларға әсерін тигізіп жатыр. Ауа температурасының жоғарылауына байланысты ауруханаларға түсетін жүктеме артқан. Дәрігерлер ыстық өту және аптаптың өзге де салдарымен келген науқастар санының көбеюін COVID-19 пандемиясы кезіндегі жағдаймен салыстырып отыр.
Сонымен қатар билік ауыл шаруашылығына айтарлықтай зиян келуі мүмкін екенін ескертті. Көптеген қалада Бастилияны алу күніне арналған мерекелік шаралар, оның ішінде отшашулар тоқтатылды. Елде орман өрті қаупі де жоғары деңгейде сақталып отыр.
Францияда табиғи өрттермен күрес жалғасып жатыр. Ло департаментіндегі ірі өрт ошақтарының бірі орман мен бұталы алқаптың шамамен 155 гектарын шарпығаннан кейін оқшауланды. Қауіпті аймақтан 86 адам эвакуацияланды.
Францияның ішкі істер министрі Лоран Нюньестің айтуынша, биыл орман өрті маусымы әдеттегіден шамамен бір ай ерте басталған. Жыл басынан бері елде өрт 25 мың гектарға жуық аумақты жойған. Бұл өткен жылдың осы кезеңімен салыстырғанда екі есеге жуық көп.
Дереккөз: azattyq-ruhy.kz
