Тоқаев VIII сайланған Парламент депутаттарының жұмысына жоғары баға берді
Фото: Ақорда
Президент Қасым-Жомарт Тоқаев VIII сайланған Парламент депутаттарының жұмысына жоғары баға берді, деп хабарлайды Qazaqtoday.info ақпарат порталы.
«Бүгінгі Парламенттің қос Палатасының бірлескен отырысының тарихи мән-маңызы айрықша деп айтсақ, дұрыс болар. Бұл дүйім халқымыз үшін де айқын нәрсе, ақиқат.
Бүгін біз мемлекетіміздің заң шығарушы органы – Парламенттің кезекті сессиясын аяқтап, Тәуелсіз Қазақстанның дамуындағы тұтас бір дәуірді қорытындылап отырмыз. Осылайша, тереңнен тамыр тартқан мемлекеттігіміздің жаңа кезеңіне қадам басқалы тұрмыз.
Ертең Қазақстан Республикасының жаңа Конституциясы заңды күшіне енеді. Ұлт заңымен қатар, мемлекеттік билік жүйесі де түбегейлі жаңа сипатқа ие болмақ. Қос палаталы Парламенттің орнына Құрылтай келеді. Жалпы, бұл өзгеріс Қазақстанда тарихи сабақтастық бар екенін анық көрсетеді», — деді Президент.
Мемлекет басшысының айтуынша, VIII сайланған Парламент заң шығару қызметінің жоғары сапасымен есте қалады.
«Сіздер Әділетті Қазақстанды құру ісіне, сондай-ақ 2026 жылғы Конституцияны әзірлеу мен қабылдау үдерісіне ерекше үлес қостыңыздар. Әрқайсыңыз болашақ саясаткерлер мен қоғам қайраткерлеріне, балаларыңыз бен немерелеріңізге: «Мен 2026 жылғы Конституцияны әзірлеу жұмысына тікелей қатыстым» деп мақтанышпен айта аласыздар», – деді Қасым-Жомарт Тоқаев.
