Ақтау қаласындағы балабақшалардың бірінің сыртынан түсірілген бейнежазба желіні шарлап, ата-аналардың жағасын ұстатты, деп хабарлайды Qazaqtoday.info порталы.
Бейнебаянда ғимарат ішінен шыққан балалардың ащы айқайы мен шыңғырып жылаған дауыстары анық естіледі. Тәрбиешілердің кішкентай бүлдіршіндерге тап беріп, зекіген дөрекі әрекеті сырт көзден жасырын қалмаған.
Желі қолданушылары мен осы мекемеге баласын берген аналар пікірде бұл балабақшаның сорақылықтарын жарыса жазып, аяусыз сынап жатыр.
Олардың айтуынша, мұнда балаларға психологиялық қысым көрсетіліп қана қоймай, асханада ашыған еттен тамақ берілген. Осындай бассыздыққа шыдамаған саналы қызметкерлердің өздері де жұмыстан кетіп қалған көрінеді. Оқырман қауым бұл мекеменің бұған дейін де талай шикілігі шықса да, таныс-тамырдың арқасында жауаптан құтылып келгенін алға тартты.
Ашуға мінген халық Ақтау қалалық білім бөлімі мен әкімдіктен камераларды түгел тексеріп, бұл «тозақтың» көзін жоюды талап етуде. Тәртіп сақшылары мен құзырлы органдар әлі де ресми мәлімдеме жасаған жоқ.
Фото: abai.kz
