Фото: видеодан скрин
Солтүстік Қазақстан облысы Уәлиханов ауданында ірі коммуналдық жанжал тұтанып жатыр. Шенеуніктер бес ауылды ауыз сумен қамтуға 2 миллиард теңге бөлінді деп есеп бергенімен, Көбенсай ауылындағы жаңа сорғы станциясы қараусыз қалған, деп хабарлайды Qazaqtoday.info ақпарат порталы.
Жергілікті тұрғын түсірген бейнежазбадан халықтың үміті болған нысанның мүшкіл күйі анық көрінеді.
Жаңа су айдау бекетінің айналасын қалың қурай басып, есігі құлыптың орнына жай ғана тақтаймен тіреліп қойылған. Стратегиялық нысанның ішіне кез келген қаңғыбас ит немесе бөтен адам емін-еркін кіре алады. Ондағы қымбат заманауи сорғылар мен үйлестіруші жабдықтар мүлдем жұмыс істемей, қалың шаңның астында босқа шіріп жатыр. Қазіргі уақытта бұл нысанды су шаруашылығы ұйымының сенімгерлік басқаруына беру процедурасы жүріп жатқан көрінеді.
Алайда, құжат дайын болғанша, мемлекеттің миллиардтары ашық аспан астында рәсуа болып, халық сусыз отыр.
