Энергетикалық жаңа дәліз: KEGOC Бакуде келіссөздер жүргізді

Фото: kegocofficial

Баку энергетика форумы аясында KEGOC компаниясының басшысы Наби Айтжанов «Азерэнержи» және Өзбекстанның Ұлттық электр желілері компанияларының өкілдерімен «Жасыл дәліз» жобасы бойынша жұмыс кездесуін өткізді. Жиын жобаны одан әрі жүзеге асыруға қатысты практикалық шешімдерді талқылауға арналды, деп хабарлайды Qazaqtoday.info порталы.

Тараптар жобаның қазіргі жағдайын саралап, техникалық-экономикалық негіздемені (ТЭН) дайындау және үш елдің жүйелік операторлары арасындағы алдағы үйлестіру мәселелерін қарастырды.

ТЭН болашақ энергетикалық дәліздің техникалық конфигурациясын айқындайды: Каспий теңізі арқылы өтетін терең суасты кабель желісінің параметрлері, түрлендіргіш қосалқы станциялар және Қазақстан, Әзербайжан және Өзбекстанның ұлттық электр желілерін күшейтуге қажетті көлем.

«Жасыл дәліз» жобасы Қазақстан, Әзербайжан және Өзбекстан арасындағы жаңартылатын энергия көздерінен (ЖЭК) өндірілетін электр энергиясын өндіру және тасымалдауды дамытуға бағытталған. Болашақта оны Еуропа нарығына шығару мүмкіндігі қарастырылған.

Жобаның негізгі мақсаты – Орталық Азия мен Кавказ арасында жаңа энергетикалық байланыс қалыптастыру, ЖЭК әлеуетін тиімді пайдалану және қатысушы елдердің энергетикалық жүйелерінің тұрақтылығын арттыру.