Қарағандыда үндістандық екі студент қаза тапты
Фото: pixabay
Қарағандыдағы Федоров су қоймасында Үндістаннан келген екі студент суға батып қаза тапты, деп хабарлайды Qazaqtoday.info ақпарат порталы.
Tengrinews.kz мәліметінше, Қарағанды облысы Төтенше жағдайлар департаментінің мәліметінше, қаза тапқандар 2004 және 2005 жылы туған жастар. Құтқарушы-сүңгуірлер олардың денесін жағадан 15 метр қашықтықта, шамамен 5 метр тереңдіктен тапты.
Қайғылы оқиға 30 мамыр күні күндіз шомылуға тыйым салынған аумақта болған.
Құтқарушылар су айдынының қауіпсіздігін сыртқы көрінісіне қарап бағалауға болмайтынын ескертеді. Адам өмірі мен денсаулығына қауіп төндіретін жерлерде шомылуға тыйым салатын арнайы белгілер орнатылады.
ТЖД өңір тұрғындары мен қонақтарын судағы қауіпсіздік ережелерін қатаң сақтауға шақырды. Мамандар жабдықталмаған жерде шомылмауды, балаларды қараусыз қалдырмауды және суға мас күйінде түспеуді ескертті.
Қазір оқиғаның мән-жайы анықталып жатыр.
