«700 млн доллар шығын»: Шымкенттегі инвесторлар полицияның қысымына шағымданды
Шымкенттегі қытайлық инвесторлар жергілікті полицияны заңсыз қысым жасап, 700 млн доллар шығынға ұшыратты деп айыптап отыр. Олар жұмыс тоқтап қалуы мүмкін екенін ескертті.
Шымкентте жұмыс істейтін қытайлық инвесторлар жергілікті полиция департаменті қызметкерлерінің заңсыз қысым жасағанын мәлімдеді. Кәсіпкерлердің айтуынша, құқық қорғау органдары зауыттың ондаған қытайлық маманын 15 күн бойы негізсіз ұстап, кәсіпорын жұмысын тоқтатуға мәжбүрлеген, деп хабарлайды Qazaqtoday.info сайты.
Металл өндіру зауытының өкілі Кэ Сююннің сөзінше, полицияның заңсыз рейді салдарынан инвесторлар 700 миллион доллар көлемінде шығынға батқан, ал мемлекет бюджетіне 200 миллион доллар салық түспей қалған. Ол полицейлердің жұмысшыларды прокуратураның араласуынан кейін ғана босатып, төлқұжаттарын қайтарғанын атап өтті.
Инвесторлар мамандар босатылғанымен, полиция тарапынан қысым әлі де тоқтамағанын алға тартады. Олар екі мемлекеттің келісімімен ашылған кәсіпорынға қатысты заңсыз тексерулердің жалғасып жатқанына алаңдаушылық білдіріп, биліктен араша сұрады.
