Атырау облысында ауруханада су жоқ: Жылыойда науқасқа бөтелке іздеткен жағдай жұртты ашуландырды

Фото: avito.ru

Атырау облысы Жылыой аудандық ауруханасының қабылдау бөлімінде ауыз су жоқ деген шағым тарады. Бұл туралы QazaqToday.info ақпараттық порталы хабарлайды.

Құлсары қаласында болған жағдай тұрғындардың наразылығын туғызды.
Тұрғынның айтуынша, жол апатына түскен сіңлісіне қарапайым су табылмаған.

Қабылдау бөлімінде ішетін су болмағандықтан, медқызметкерлер “сатып әкелесіздер” деп айтқан.
Ауру адамға ең керек кезде су берілмегені жұрттың ашуын келтірді.

Шағым иесі мереке күндері ауруханаға небәрі 5 бөтелке су ғана жеткізілгенін айтады.
Қазір оның өзі таусылып, адамдар сырттан су іздеуге мәжбүр болған.
Кіреберісте тұрған адамдардың наразылығы күшейіп, түсінбеушілік шыққан. Тұрғындар облыс орталығына жақын ауданда мұндай жағдай болмауы керек дейді.