Кептірілген балықтың тұзды тұзағы: дәрігерлер қауіпті ауруларды атады
Көпшілік сүйіп жейтін кептірілген таран балығының денсаулыққа зияны көп болып шықты. Дәрігерлер тұздың көптігі бүйрек пен қан қысымына қауіп төндіретінін айтады.
Көптеген адамның сүйікті тісбасары саналатын кептірілген таран балығын үнемі тұтыну денсаулыққа айтарлықтай зиян келтіруі мүмкін. Дәрігерлер бұл өнімнің қауіптілігі туралы дабыл қағып отыр, деп хабарлайды Qazaqtoday ақпарат агенттігі.
Мамандардың айтуынша, балықты дайындау технологиясы оның барлық пайдалы қасиетін жояды. Өнімді ұзақ сақтау үшін оны шамадан тыс тұздайды. Мұндай өңдеуден өткен соң балық құрамындағы ақуыздың құнарлылығы төмендеп, ағзаға сіңуі қиындайды.
Алайда, ең басты қауіп – тұздың мөлшері. Тұзды шамадан тыс қолдану қан қысымының көтерілуіне (гипертония) тікелей әсер етеді. Сонымен қатар, бүйрекке салмақ түсіп, оның жұмысын нашарлатады, ал асқазан-ішек жолдарында түрлі аурулардың туындауына себеп болуы мүмкін.
«Гипертония, бүйрек жеткіліксіздігі және асқазан ауруларына шалдыққан адамдарға тұздалған және кептірілген балықтан толықтай бас тартуға кеңес береміз. Дені сау адамдардың өзі бұл өнімді өте сирек жегені абзал», — дейді диетологтар.
Осылайша, жиі тұтынылатын қарапайым тісбасар ағза үшін «тұзды тұзаққа» айналып, созылмалы аурулардың дамуына түрткі болуы ықтимал.
Фото: Әлеуметтік желіден
