Олимпиадада сүрінген Ажғалиев: «Мен тактикалық қателік жібердім»

Қазақстандық шорт-трекші Абзал Ажғалиев Олимпиада ойындарында 500 метрлік қашықтықтағы ширек финалдан аса алмауының себебін түсіндірді, деп хабарлайды Qazaqtoday ақпарат агенттігі.

Спортшының айтуынша, жарыс барысында екінші орынды сақтап қалуға тырысқан кезде тактикалық қателікке бой алдырған. Бұл сәтсіздік оның жартылай финалға өтуіне кедергі болды.

«Мен екінші позицияны қорғау кезінде тактикалық қателік жібердім. Сонымен қатар, қарсыласымның да жылдамдығы басым түсті. Өкінішке қарай, бәрі осылай аяқталды», — деді Ажғалиев.

Сонымен қатар, спортшы өзінің мансабындағы төртінші Олимпиадасына қатысып, осы уақытқа дейін қолдау білдірген жанкүйерлеріне ризашылығын білдірді.

Фото: Әлеуметтік желіден