Қарсылық көрсеткен: Шымкентте әйелді өлтірген күдіктіге полиция оқ атты

Шымкентте әйел адам пышақ жарақатынан көз жұмды, ал оны өлтірді деген күдіктіні ұстау кезінде полиция қызметкерлері қару қолдануға мәжбүр болды, деп хабарлайды Qazaqtoday ақпарат агенттігі.

Қайғылы оқиға туралы полицияға куәгерлер хабарлаған. Белгілі болғандай, қылмыскер мен жәбірленуші бұрыннан таныс болған. Олардың арасындағы жеке бас араздығы осындай жантүршігерлік жағдайға ұласқан. Әйел оқиға орнында тіл тартпай кеткен.

Шымкент қаласының Полиция департаменті күдіктінің ізін суытпай ұсталғанын мәлімдеді.

«Ұстау кезінде қарулы күдікті қарсылық көрсетті. Сол себепті полиция қызметкерлері табельдік қару қолданды», — деп хабарлады ведомствоның баспасөз қызметі.

Оқ тиіп жараланған ер адам медицина мекемесіне жеткізіліп, қамауға алынды. Қазіргі уақытта осы оқиғаға қатысты тергеу амалдары жүріп жатыр.

Фото: Әлеуметтік желіден