Адамды алдайтын ЖИ-ге тыйым салынды: Қазақстанда маңызды заң күшіне енді

Қазақстанда жасанды интеллектіні (ЖИ) реттейтін жаңа заң толық күшіне енді. Бұл құжат технологияны қолданудың негізгі қағидаттарын, тараптардың жауапкершілігін және азаматтардың құқығын қорғау шараларын айқындайды, деп хабарлайды Qazaqtoday ақпарат агенттігі.

Заңның негізгі қағидаты – адам құқығының басымдығы. Яғни, жасанды интеллект азаматтарды саналы шешім қабылдау құқығынан айырмауы тиіс. Енді кез келген компания немесе мекеме азаматтардың дерегін жасанды интеллект арқылы өңдейтін болса, оларға бұл туралы ескертіп, оның салдарын түсіндіруге міндетті.

Сонымен қатар жауапкершілік мәселесі нақты бөлінген. Технологияның жұмысына оның иесі, қолданушысы және әзірлеушісі бірдей жауапты болады.

Жаңа заң бойынша жасанды интеллект жүйелері қауіп деңгейіне қарай жіктеледі. Ол ең төменгіден бастап, аса жоғары қауіптіге дейін бөлінеді. Қаупі жоғары деп танылған жүйелерге мемлекеттік жүйелермен бірдей қауіпсіздік талаптары қойылады.

Заңда бірнеше әрекетке қатаң тыйым салынған. Нақтырақ айтқанда, мынадай ЖИ жүйелерін қолдануға болмайды:

– Адамдарды манипуляциялайтын және алдайтын;
– Адамның әлсіз тұстарын (жасы, денсаулығы, әлеуметтік мәртебесі) пайдаланатын;
– Кемсітушілікке жол беретін;
– Адамның келісімінсіз оның эмоциясын анықтайтын;
– Дербес деректер туралы заңнаманы бұзатын;
– Тыйым салынған контент жасайтын.

Ең маңызды жаңалықтың бірі – жасанды интеллект көмегімен жасалған кез келген контент міндетті түрде таңбалануы керек. Ал авторлық құқық тек адамның шығармашылық үлесі болған жағдайда ғана мойындалады.

Фото: Әлеуметтік желіден