Екі көлік өртеніп кеткен: Атырау облысында жол апатынан 1 әйел көз жұмды

Фото: Видеодан алынған кадр

4 қаңтар күні шамамен сағат 19:15-те республикалық маңызы бар Атырау – Орал автожолында, Qazaq Oil жанармай құю бекетінің маңында жол-көлік оқиғасы тіркелді, деп хабарлайды Qazaq Today ақпарат порталы. 

Облыстық полиция департаментінің мәліметінше, 2004 жылы туған жүргізуші басқарған Mercedes маркалы автокөлік қарсы бағыттағы жолаққа шығып кетіп, 1979 жылы туған азамат тізгіндеген «Газель» көлігімен соқтығысқан.

Қатты соққының салдарынан екі автокөлік те оқиға орнында жанып кеткен. Жол апаты кезінде «Газель» көлігінде болған 1966 жылы туған жолаушы әйел адам қаза тапты.

Аталған дерек бойынша қылмыстық іс қозғалып, тиісті материалдар жиналуда. Қазіргі уақытта оқиғаның барлық мән-жайы анықталып жатыр.

Полиция жол қозғалысына қатысушыларды ережелерді қатаң сақтауға және қарсы қозғалыс жолағына шығу кезінде барынша мұқият болуға шақырды.