Қостанай облысында шарпыған орман өртімен күрес жұмыстары әлі жалғасып жатыр. Төтенше жағдайлар министрлігі өрт аумағы 10 мың гектарға жуықтағанын бұған дейін хабарлаған еді. Елдімекендерден мыңдаған адам қауіпсіз жерге шығарылған. Оларға жан-жақты көмек көрсетілуде.

Ал, «AMANAT» партиясының төрағасы, Мәжіліс спикері Ерлан Қошанов өңірге еріктілерді жіберіп, ертеңнен бастап халыққа көмектесуге кірісетінін мәлімдеді. Сонымен қатар, әр облыстағы партия филиалдарында гуманитарлық көмек жинау орталықтары жұмысын бастайды.

«Ертең партия мүшелері мен «Жастар Рухы» қатарынан волонтерлер жасақталып, апаттан зардап шеккен тұрғындарға барынша көмек көрсететін болады.

Бұдан бөлек таңертеңнен бастап «AMANAT» партиясының өңірлердегі филиалдарында гуманитарлық көмек қабылдау пункттері ашылады.

Жағдайдың тезірек тұрақталуын тілейміз. Біз қостанайлықтармен біргеміз және бұл сынақтан бірге өтеміз», — деп жазды Е.Қошанов өзінің Facebook-парақшасында.