Аудан әкімдігі жүргізушісі қызметтік көлікпен бастығының қызын тасып жүр: әкімдік түсінік берді

Желіде Жетісу облысы Кербұлақ ауданы әкімдігінің жүргізушісі күн сайын қызметтік көлікпен аудан әкімдігі аппараты басшысының қызын таситыны туралы ақпарат тарады, деп хабарлайды Qazaq.today 

Жетісу облысы әкімдігінің мәліметінше, кеше аудан әкімдігі жүргізушісі аппарат басшысының қызын көріп қалып, мектепке апарып тастаған.

«Аудан әкімі аппаратының басшысы Ғабит Мөлдір Ғабитқызы мемлекеттік нөмірі 268 AG 19, «Hyundai TUCSON» маркалы қызметтік автокөлігін тек қызметтік мақсатта және жұмыс уақытында пайдаланып жүр. 23 қарашада таңғы сағат: 07.40-та аппарат басшысы Мөлдір Ғабитті сол қызметтік көлікпен жеке жүргізушісі С. Кетпенбаев жұмыс орнына жеткізіп тастап, автокөлікті жуып келетінін ескертіп көлік жуу орнына сұранып кеткен. Көлік жуу орнынан қайтып келе жатқанда, аппарат басшысы Мөлдір Ғабиттің мектеп оқитын қызын көріп қалып, ешкімнің рұқсатынсыз мектепке дейін жеткізіп тастап, жұмыс орнына келген», — делінген Кербұлақ ауданы әкімдігінің берген түсініктемесінде.

Ведомство өкілдері көлік жүргізушісі бұл туралы аппарат басшысына ескертпегенін айтты.

фото: видеодан кадр

Qazaq.today