«Авангард» — «Барыс»: КХЛ матчының тікелей трансляциясы 18:30-да басталады
20 қарашада Омбыда «Авангард» пен «Барыс» КХЛ тұрақты чемпионатының матчын өткізеді. Тікелей трансляция 18:30-да «Qazsport» телеарнасында басталады.
Сурет: sports.kz
20 қараша, жұма күні Омбыда Құрлықтық хоккей лигасының (КХЛ) тұрақты чемпионатының матчы өтеді: «Авангард» өз алаңында «Барысты» қабылдайды.
Бұл туралы Qazaqtoday.info сайты хабарлайды.
«Авангард» — «Барыс» матчының тікелей трансляциясы Қазақстан уақытымен 18:30-да басталып, «Qazsport» телеарнасынан көрсетіледі.
«Барыс» 27 матч өткізіп, 29 ұпай жинаған. «Авангард» 26 ойында 32 ұпайға қол жеткізген. Тұрақты чемпионаттағы соңғы кездесуінде «Авангард» өз алаңында Владивостоктың «Адмиралын» 3:1 есебімен жеңіп, жеңіс сериясын үш ойынға созды. «Барыс» болса алдыңғы чемпионат матчында Уфаның «Салават Юлаевына» қонақта 3:5 есебімен жол берді.
Осы маусымда «Авангард» мен «Барыс» бір рет кездескен — 10 қазанда Астанада өткен ойында астаналық клуб 5:1 есебімен сенімді жеңіске жеткен болатын. КХЛ аясындағы соңғы бес ойында Астана командасы үш жеңіске қол жеткізсе, қарсыласы екі рет басым түскен.
